खाकीतील माणुसकीचे दर्शन आरपीएफ जवानाच्या तत्परतेमुळे ७५ वर्षीय आजोबांचे प्राण वाचले

गुरुवार २६ फेब्रुवारी २०२६

पुर्णा (जिल्हा परभणी)

पुर्णा जंक्शन रेल्वे स्थानकावर धावती रेल्वे पकडण्याच्या नादात पाय घसरून चाकाखाली जाणाऱ्या एका ७५ वर्षीय वृद्धाला महिला रेल्वे सुरक्षा दलाच्या (RPF) सतर्कतेमुळे जीवदान मिळाले आहे. सोमवारी संध्याकाळी ७:५३ वाजता घडलेल्या या थरारक घटनेने स्थानकावरील उपस्थितांच्या काळजाचा ठोका चुकला होता. रमा शर्मा असे या देवदूत ठरलेल्या महिला पोलीस जवानाचे नाव आहे.नेमकी घटना:मिळालेल्या माहितीनुसार, १७६१४ पनवेल एक्सप्रेस ही गाडी सोमवारी संध्याकाळी ७:४८ वाजता पुर्णा स्थानकाच्या प्लॅटफॉर्म क्रमांक २ वर दाखल झाली होती. ५ मिनिटांच्या थांब्यानंतर ७:५३ वाजता ही गाडी स्थानकावरून रवाना होऊ लागली.याच वेळी परभणी जिल्ह्यातील इटाली (मानवत) येथील रहिवासी असलेले बाबूराव घाटगे (७५) हे घाईघाईने धावत्या गाडीत चढण्याचा प्रयत्न करत होते.मात्र, गाडीने वेग घेतल्यामुळे त्यांचा तोल गेला आणि पाय पायरीवरून निसटला.महिला पोलिसाची समयसूचकता:बाबूराव घाटगे हे प्लॅटफॉर्म आणि धावत्या डब्याच्या मधल्या धोकादायक पोकळीत ओढले जात असल्याचे पाहताच, तिथेच गस्तीवर तैनात असलेल्या आरपीएफ कॉन्स्टेबल रमा शर्मा यांनी क्षणाचाही विलंब न लावता त्यांच्या दिशेने धाव घेतली. आपल्या जिवाची पर्वा न करता शर्मा यांनी वृद्धाला ताकदीने बाहेर ओढले. यावेळी जवळच असलेले प्रवासी रमेश पंडित आणि इतर नागरिकांनीही मदतीसाठी धाव घेतली.प्रशासनाकडून कौतुक:वेळेवर मदत मिळाली नसती, तर मोठा अनर्थ घडला असता, असे प्रत्यक्षदर्शींनी सांगितले. बाबूराव घाटगे यांना कोणतीही गंभीर दुखापत झाली नसती तरी ते मोठ्या धक्क्यात होते. आरपीएफ जवान रमा शर्मा यांच्या या धाडसी कृत्याचे रेल्वे प्रशासन आणि नागरिकांकडून मोठ्या प्रमाणावर कौतुक होत आहे.सावधानता बाळगण्याचे आवाहन:रेल्वे प्रशासनाने या निमित्ताने प्रवाशांना पुन्हा एकदा आवाहन केले आहे की, धावती ट्रेन पकडणे जीवावर बेतू शकते.घाई टाळून प्रवाशांनी स्वतःच्या सुरक्षेला प्राधान्य द्यावे,असे आवाहन पुर्णा रेल्वे प्रशासनातर्फे करण्यात आले आहे.